GITUN-AN karon sa syudad kauban ang rehiyonal nga buhatan sa Department of Agriculture – Philippine Rural Development Project (DA-PRDP) ang pagpahimutang og potable water system sa Brgy Besigan.

 

Ning bag-o lang nagpahigayon og public consultation ang City Local Environment and Natural Resources Office (Clenro), City Assessor’s Office, City Planning and Development Office (CPDO), City Engineers Office ug DA-PRDP sa mga molupyo sa maong barangay.

 

Ang maong consultation gipangulohan sa City Agricultural Productivity Office diin giaghat ni Acting City Agriculturist Engr. Bernie Daba Jr. nga ang aktibong partisipasyon sa mga residente usa ka dakong tabang aron masiguro nga ang giplanong water system motubag sa dugay nang panginahanglan sa komunidad.

 

Ang Philippine Rural Development Program (PRDP) sa Department of Agriculture nagpaluyo sa mga proyekto sa rural infrastructure ug agri-fishery aron mapaayo ang produksiyon, merkado, ug serbisyo sa kabaryohan.

 

Subay niini, ang CAPOO magpahigayon og house-to-house validation sa Enero 22 hangtod 23 aron sa pagsusi sa kasamtangang sistema sa tubig lakip usab ang pagdokumento sa panginahanglanon sa panimalay nga mahimong basihan sa teknikal nga plano sa proyekto. (LRM/CIO photos from CAPOO)