MAGPATUMAN ang Night Market Management Committee (NMMC) og temporaryong suspensyon sa pagpamaligya sa pipila ka mga night market vendors, ilabina sa Daumar Street, sugod Pebrero 3, base sa kasabutan nga nahimo atol sa miting nga gipahigayon, Huwebes, Enero 22.

 

Kini subay sa nakitang paglapas sa mga vendors sa mga patakaran, lakip ang dili sakto nga pagdumala sa basura, pagpangasaba sa mga collectors panahon sa koleksyon, ug ang paglapas sa gitakdang oras sa pagpamaligya nga hinungdan sa grabe nga trapiko sa maong lugar.

 

Ang maong suspensyon sa pagpamaligya gituyo aron mapahimangnoan ug disiplinahon ang sayop nga mga buhat sa mga vendors, aron usab masiguro ang kahapsay, kalimpyo, ug hapsay nga dagan sa trapiko sa palibot sa night market.

 

Ang maong desisyon giaprobahan nila Councilor Edgar Cabanlas, Councilor Eric Salcedo, ug Councilor Marlo Tabac uban sa suporta ni Mayor Rolando “Klarex” Uy.

 

Naglaum ang lokal nga kagamhanan nga pinaagi niini nga lakang, mapalig-on ang disiplina ug mas hapsay nga operasyon sa night market sa syudad.

 

Gipahimangnoan usab ang tanang vendors nga posible pang masundan sa dugang nga temporaryong suspensyon sa pagpamaligya ang ubang mga area kon magpadayon ang paglapas sa mga patakaran. (DYM/Photos by Johnel Neri/CIO)