DAKONG garbo sa syudad ang kadaugan ug pagdawat og pinakataas nga national recognition ni City Health Officer Dr. Rachel Dilla, human siya gipasidunggan isip 'Gawad Lingkod Bayan ng Pangulo' atol sa PAGPUPUGAY 2026: Parangal para sa Lingkod Bayan, nga gipahigayon sa Malacañang Palace niadtong Martes, Enero 27, ning tuiga.

 

Ang maong pasidungog gihatag ngadto kang Dr. Dilla human siya gi-nominate sa Office of the City Human Resource Management Officer ubos sa pagpangulo ni Acting Department Manager Xsyclyn Faith Lumbatan, tungod sa talagsaon niyang liderato ug kalampusan sa City Health Office (CHO).

 

Ang PAGPUPUGAY usa ka prestihiyosong programa sa Civil Service Commission (CSC) nga nag-ila sa mga kawani sa gobyerno nga nagpakita og labing hataas nga lebel sa dungog, kahanas, ug dedikasyon sa pag-alagad sa katawhan.

 

Ang Gawad Lingkod Bayan ng Pangulo mao ang labing halangdong pasidungog sa maong programa.

 

Personal nga gipangulohan ni President Ferdinand Marcos Jr. ang seremonya sa paghatag sa pasidungog, isip pag-ila sa mga indibidwal nga adunay talagsaong performance, epektibong reporma sa pang-gobyerno, ug dakong kontribusyon sa kalamboan sa nasud.

 

Mitambong usab sa kalihokan si City Administrator Atty. Roy Hilario Raagas, nga nagrepresentar kang Mayor Rolando 'Klarex' Uy, isip pagpamatuod sa lig-on nga suporta sa lokal nga kagamhanan sa liderato, integridad, ug dedikasyon nga gipakita ni Dr. Dilla sa iyang pagdumala sa City Health Office. (MDS/CIO)