SA tinguha nga mas mapalambo ug mapalapad pa ang pagprotehir, pag-amoma ug pagpanalipod sa kinaiyahan ning syudad, gilusad ni Mayor Klarex Uy, pinaagi sa City Local Environment and Natural Resources Office (Clenro) ang Kalimpyo Awards Program (KAP) atol sa Solid Waste Management Summit adlaw’ng Lunes, Enero 26 ning tuig.

 

Tumong sa KAP nga matabangan ug maila ang mga barangay nga nagpatuman sa epektibo, binag-o, moderno ug malungtaro’ng stratehiya sa solid waste management pinaagi sa waste segregation, reduction, recycling ingon man partisipasyon sa komunidad sa pagpanghinlo, disiplina ug responsibilidad sa kinaiyahan.

 

Lakip usab sa tinguha sa Clenro, sa pagpangulo ni Acting Department Manager Elvisa Mabelin, nga maila ang barangay isip primary frontliner sa solid waste management ug ang hiniusang paningkamot sa pagkab-ot og “cleaner, healthier ug climate-resilient” nga dakbayan.

 

Matud ni Mabelin bahinon ang 80 ka barangay ngadto sa tulo (3) ka kategorya:

 

• Urban Barangays (40) – Barangays 1-40

 

• Sub-Urban Barangays (27) – Lumbia, Balulang, Canitoan, Pagatpat, Carmen, Patag, Bulua, Iponan, Kauswagan, Bayabas, Bonbon, Puntod, Macabalan, Lapasan, Nazareth, Macasandig, Camaman-an, Gusa, Cugman, Tablon, Agusan, Puerto, Bugo, Consolacion, Balubal ug Indahag

 

• Hinterland Barangays (13) – Mambuaya, Dansolihon, Bayanga, Besigan, Pagalungan, Tagpangi, Tuburan, Tignapoloan, Baikingon, San Simon, Pigsag-an, Taglimao, Tumpagon ug FS Catanico.

 

Sugdan ang barangay profiling karong Pebrero ug Marso samtang magsugod gilayon ang monthly monitoring sa Abril.

 

Ang awarding ceremony ipahigayon sa Enero 26, 2027. (ACM/ Photos by KIM ZALDIVAR/CIO)