Laing hugna sa fumigation activity ang gihimo sa syudad ubos sa administrasyon ni Mayor Rolando `Klarex’ Uy pinaagi sa City Health Office (CHO), ug City Economic Enterprises and Business Development Administration (CEEBDA) diha sa Cogon market Enero 30, 2026.

 

Kini ang ikaduhang higayon nga naghimo sa maong kalihokan ang syudad sa tinguha nga mawala ang kagaw ug virus nga dala sa nagkadaiyang matang sa mananap sama sa ilaga, ok-ok ug uban pa nga posibleng motapot sa mga baligyang produkto ug mga pagkaon sulod sa merkado.

 

Una nang gipadayag ni Mayor Klarex nga kinahanglan magpahigayon og regular nga fumigation sa kamerkaduhan. Gani buot sa mayor nga matag bulan kini himoon aron masiguro nga limpyo ang merkado ug luwas ang mga baligyang produkto nga mapalit sa katawhan.

 

Sa wala pa ang fumigation, nag-flushing ang CEEBDA sa Cogon market niadtong Enero 23 ug 29.

 

Samtang gibutyag ni CEEBDA Acting General Manager Atty. Marianne G. Ragas nga ilang paningkamutan uban sa CHO nga adunay regular nga fumigation ug flushing activity sa kamerkaduhan.

 

Apan dili pa madesisyonan kon matag bulan tungod usab sa pipila ka mahinungdanong rason. (ALR/CIO/Photos from CEEBDA)