MAPAHIMUSLAN na sa publiko ang Primary Clinical Laboratory sa Cagayan de Oro City Hospital–Lumbia human kini pormal nga giabrihan Miyerkules, Pebrero 11.

 

Ang pagbukas sa laboratoryo ubos sa pagpangulo ni Dr. Ferdie Miranda, acting Chief of Hospital, usa ka dakong lakang sa pagpalig-on sa mga serbisyong gihatag sa infirmary facility sa City Hospital Lumbia.

 

Ang Primary Clinic Laboratory naghatag og serbisyo sama sa Complete Blood Count (CBC), Fasting Blood Sugar (FBS), Lipid Profile (Total Cholesterol, Triglycerides, HDL ug LDL), Uric Acid, Urinalysis, Fecalysis, Hepatitis B screening, ug pregnancy test.

 

Aron masiguro ang tukma ug dekalidad nga resulta, kumpleto kini sa mga ekipo sama sa hematology machine, clinical chemistry machine, ug microscope.

 

Abli ang laboratoryo matag Lunes hangtod Biyernes, alas 8:00 sa buntag hangtod alas 4:00 sa hapon.

 

Apan ang Lipid Profile ug FBS ipahigayon lamang matag Martes ug Huwebes.

 

Sumala kang Dr. Miranda, nagsugod na og operasyon ang laboratoryo niadtong Disyembre 18 human makakuha og License to Operate gikan sa Department of Health (DOH), apan limitado pa lamang ang ilang gi-akomodar tunggod kay gisiguro nila ang kahingpitan sa pasilidad.

 

Sa karon, andam na kini ug full operation na alang sa publiko.

 

Matud ni Dr Miranda dili na kinahanglan monaog pa sa City Health Office o ba kaha sa JR Borja General Hospital ang mga residente sa Lumbia ingon man ang kasikibit nga mga barangay aron magpa-laboratory kay ania na mismo sa Lumbia hospital ang laboratory.

 

Misaksi sa kalihukan si City Councilor Roger Abaday, spokeperson Jan “Janboy” Guilmore Actub ug Chief of Staff Shiela Lumbatan.

 

Gipasabot usab ni City Councilor Roger Abaday nga kining laboratoryo kabahin sa commitment ni Mayor Rolando “Klarex” Uy nga ipaduol ang serbisyo sa gobyerno ngadto sa katawhan.

 

Gidugang usab ni Ms. Sheila Lumbatan nga ang primary laboratory simbolo sa paglaum sa katawhan tungod kay mas mapadali ug mas mapaabot na sa tanan dato man o kabos ang dekalidad nga serbisyong medikal.

 

Ang maong laboratoryo gipangulohan ni Dr. Fatima Raagas, Head of Laboratory, uban sa mga medical technologists nga sila Jelaica Batislaon ug Renz Christopher Calo.

 

Ang pagbukas sa laboratory nagpamatuod sa padayon nga paningkamot sa lokal nga kagamhanan ubos sa pagpangulo ni Mayor Klarex Uy sa paghatag og dekalidad ug accessible nga serbisyong panglawas alang sa tanang Kagay-anon. (DYM/Photos by Reynan Baylin)