GIHAN-AY na sa kagamhanang lokal sa Cagayan de Oro ubos sa administrasyon ni Mayor Rolando 'Klarex' Uy pinaagi sa buhatan sa Oro Trade and Investment Promotions Center (ORO TIPC) ug City Tourism and Cultural Affairs Office kauban ang hugot nga koordinasyon sa Filipino-Chinese Community ang nagkadaiyang mga kalihokan pagsugat sa 2026 Chinese New Year.

 

Gibutyag ni Local Economic Development & Investment Promotions Officer John Asuncion nga ipahigayon ang opening ceremony karong Pebrero 16, alas 6:00 sa gabii sa Rio de Oro Boulevard (Puntod area), diin masaksihan ang sagol nga traditional, cultural ug modern performances nga idalit sa mga tinun-an sa duha ka mga Chinese schools sa dakbayan.

 

Ipahigayon usab ang naandan nga 'pyro music fireworks,' ug pagbukas sa usa ka semana nga Chinese Food Bazaar.

 

Mapasalamaton usab si Fil-Chinese community Chairman Efren Uy sa hugot nga suporta sa 23 ka mga Fil-Chinese organizations diin nagpakita sa hugot ug maayong relasyon sa Fil-Chinese community ug sa syudad.

 

Lakip sa mga naandan nga kalihukan ang pagpahigayon og Lion Dance sa pipila ka bahin sa syudad, motorcade, pagpanghatag og tikoy, 'Wok of Fortune' Bell Church visit ug Dragon boat race nga salmotan sa dul-an 500 ka mga partisipante gikan sa nagkadaiyang teams sulod ug gawas sa Cagayan de Oro. (AGP/CIO FILE PHOTO)