APROBADO na sa konseho ang donasyon sa siyam (9) ka sakyanan sa kabarangayan ning syudad pinaagi sa paghatag og pagtugot kang Mayor Klarex Uy sa pagpirma og Deed of Donation niini.

 

Ang maong pagtugot natigayon atol sa pinakaulahing city council session adlaw’ng Lunes, Pebrero 9.

 

Ang mga barangay nga makadawat sa mga sakyanan mao ang Barangay Camaman-an, Dansolihon, Canitoan, Consolacion, Lapasan, Mambuaya, Patag, Bugo, ug Puerto.

 

Ang mga sakyanan magamit lamang alang sa opisyal nga katuyoan sa barangay, lakip na ang kaluwasan sa katawhan, disaster response, suporta sa panglawas ug sanitation, ug uban pang lehitimong operasyon sa barangay.

 

Sumala sa ordinansa, ang matag barangay nga makadawat sa sakyanan mao ang responsable sa gasto sa gasolina, maintenance, ug hustong pagmintinar sa mga rekord sa accountability sa maong mga sakyanan.

 

Matud ni Vice Mayor Jocelyn 'Bebot' Rodriguez nga ang mga benepisyaryo’ng barangay napili tungod sa gagmay’ng kadalanan nga igo lamang maserbisyohan sa gagmay nga mga sakyanan.

 

Gilauman nga dako kini’g tabang sa mga barangay nga nagkinahanglan gayod sa maong mga sakyanan aron magamit sa hustong pagpatuman sa ilang opisyal nga katungdanan ug serbisyo sa komunidad.(MDS/Photos by Jomar Figuracion/CIO)