World Health Organization
Department of Health 
Hingpit na nga maangkon sa mokabat 56 ka mga residenti sa Sendong relocation site ang yuta nga gitukoran karon sa ilang balay human gipirmahan ni Mayor Oscar Moreno ang Deed of Sale, karong adlawa, Hulyo 13, 2021.
Kini ang ikaduhang batch sa mga molupyo sa Cagayan de Oro Resettlement Socialized Housing Project –I Phase 3, Habitat for Humanity ug usa sa mga Sendong relocation sites sa syudad ang mahatagan og titulo sa yuta ubos sa inisyatiba sa City Housing & Urban Development Department CHUDD) pinangulohan ni Engr. Ermin Stan Pimentel.
Adunay 1,533 households ang CDORSHP-I Phase 3, ug 200 niini ang nakakumpleto na sa ilang mga requirements, apan 56 pa lamang ang nakabayad sa ilang mga bayronon ilabina sa yuta tungod sa mga kakulian nga nasinati sa uban.
Basi sa City Ordinance No.13990-2021, kinahanglan mabayran una nila ang kantidad sa yuta ayha pirmahan ni Mayor Moreno ang Deed of Sale.
Ang Deed of Sale maoy usa sa mga requirement alang sa pagpatitulo sa yuta nga isumite sa buhatan sa Registry of Deeds (ROD).
Lima ka mga benepisyaryo sa Sendong relocation sites titling program ang mipirma sa Deed of Sale uban ni Mayor Moreno alang sa ceremonial signing ug pagsunod sa health protocols sa syudad.
Lakip usab sa misuporta sa maong kalihokan sila si City Councilors Maria Lourdes Gaane ug Edgar Cabanlas, mga personahi sa CHUDD pinangulohan ni Engr. Pimentel. (ALR/Photos by Aicy Soriano/CIO)
