World Health Organization
Department of Health 
KATORSE na ka high flow oxygen ang anaa karon sa JR Borja General Hospital alang sa COVID 19 patients human nadugangan og upat ang napalit sa LGU-CDO ubos sa administrasyon ni Mayor Oscar Moreno pinaagi sa Logistics Cluster nga kabahin sa Emergency Operation Center for Covid response.
Ang high flow oxygen makatabang sa mga pasyente ilabina ang mga naglisod sa pag-ginhawa ug sa ingon makatabang usab sa pagpaubos sa paggamit sa mechanical ventilator sa mga COVID referral hospitals nga adunay taas nga level sa Critical Care Utilization Rate (CCUR), sama na lamang sa Cagayan de Oro.
Sa July 12 data sa FASSTER Philippines, ang mechanical ventilator rate sa Cagayan de Oro anaa na sa 52.50%, diin lapas na kini sa 30% threshold nga gikonsiderang normal level sa Department of Health.
Tumong sa administrasyon ni Mayor Moreno nga mapaubos pa ang key indicators sa CCUR nga naglakip na sa paggamit og mechanical ventilators, isolation beds ug intensive care units aron mahibalik na sa Modified General Community Quarantine (MGCQ) ang syudad nga kasamtangang anaa karon sa Modified Enhanced Community Quarantine (MECQ). (ACM/CIO)
