World Health Organization
Department of Health 
GIPAHIBALO sa City Finance Department nga kutob lang karong Hulyo 20 ang deadline sa pagbayad sa renewal sa business permit alang sa third quarter karong tuiga.
Giaghat ni Jason Adaza, acting chief sa Business Permitting and Licensing Division sa CFD, ang mga negosyante sa syudad nga pahimuslan ang online tax payment and billing system aron dili na mahasol pagdalikyat sa city hall kung magbayad sa ilang buhis, ug usab maproteksyonan ang ilang kaugalingon batok Covid-19.
Apan pwede ra gihapon ang over-the-counter payment sa city hall alang niadtong walay access sa internet, dugang pa ni Adaza.
Ang online tax payment makita sa website nga: cityfinance.cagayandeoro.gov.ph
Ang City Finance ubos sa pagpangulo ni City Treasurer Jasmin Maagad nagtanyag karon og mga payment option pinaagi sa Visa credit/debit card, Bancnet, Land Bank; online banking sa Robinsons Bank, Union Bank ug RCBC Bank; ug mga cash payment centers sa 7-Eleven, ECPay ug Bayad Express.
Hinoon, gipahimangnoan ni Adaza ang mga negosyante sa syudad nga mapahamtangan og penalty nga 25% sa tax due ug 2% kada bulan nga surcharge kadtong mapakyas pag-renew ini’g lapas sa deadline karong Hulyo 20.
Taliwala sa pandemya nga dala sa Covid-19, misaka gihapon ang mga negosyo sa syudad nga nagparehistro as of July 15 karong tuiga nga miabot na sa 27,580, kon itandi sa 26,879 sa miaging tuig. (IAF/CIO)
