Matud ni Dr. Teodoro Yu Jr., medical officer sa CHO, nga sa upat nga una nang nataho sa Batch 4, tulo lamang ang taga-Cagayan de Oro nga pulos kauban sa trabaho ug gikatahong gipailawom na sa re-swabbing kagahapong adlawa, bisan pa man nga una na silang gideklara nga clinically recovered.

Gipasabot ni Dr. Yu nga nagpadayon pa gihapon ang close contact monitoring sa second ug third generation diha sa Barangay Macasandig, Carmen ug Balulang, ilabina sa mga nakasinati sa influenza-like illness ug acute respiratory illness (ALI/ARI).

Nasayran nga una na sila’ng nagpositibo niadtong July 26 ug na-isolate niadtong july 27. Gideklara silang clinically recovered niadtong August 11 lamang. Apan kasamtangang anaa na usab sila sa isolation facility human migawas ang resulta gikan sa Philippine Genome Institute ug nasutang lakip sila sa nataptan sa Delta variant.

Subay niini, subli na usab nagpahinumdom ang CHO sa katawhan ilabina sa mga nagtrabaho nga batasanon ang pagsunod sa minimum public health standards sa tanang panahon.