World Health Organization
Department of Health 
BUKSAN na ang COVID ward sa ikatulong andana sa Pimentel building atol sa pagsaulog sa ika-58 ka tuig nga kasumaran sa pagkamugna sa JR Borja General Hospital ugma’ng adlawa, Agosto 25, 2021.
Ang 100-bed capacity nga JRBGH natukod niadtong 1963 ug maoy nag-inusarang local government hospital sa Cagayan de Oro nga maoy mag-atiman sa kapin 700,000 ka mga molupyo ning syudad, ug bisan sa kasikbit nga mga probinsya.
Sa pagsugod sa administrasyon ni Mayor Oscar Moreno sa 2013, prayoridad niini ang pag-atiman sa JRBGH o nailang city hospital sanglit wala mahatagi og pagtagad sa dugay nang panahon.
Una’ng giatiman sa Moreno administration ang South Wing o Pimentel building ug nasundan gilayon sa katukoran sa East Wing ug North Wing building pinaagi sa pag-abag sa Department of Health sa ilang programang Health Facility Enhancement Program o HFEP.
Sa kasamtangan, sangkap na sa modernong laboratory equipment, blood bank, pharmacy, x-ray laboratory, critical care unit ang hospital ug gipaabot na usab ang pagtibawas sa dialysis center, uban sa Private-Public partnership.
Naglaum si Mayor Moreno nga mailang “premier local government hospital” sa tibuok nasud ang JRBGH nga adunay “fiscal autonomy” ug “preferential option for the poor.”
Matud ni Mayor Moreno andam ang JRBGH sa pagdawat sa tanang
nanginahanglan og serbisyong medical, bisan pa man sa kasikbit nga mga probinsya sanglit walay giilang boundary ang pagserbisyo sa panglawas. (ACM/File Photos/CIO)
