World Health Organization
Department of Health 
PADAYON na ang operasyon sa crematorium sa Divine Shepherd Memorial Gardens adlaw'ng Lunes human kini nakasinati og aberya sa ilang kahimanan tungod sa paspas nga cremation process.
Matud ni Engr Armen Cuenca, head sa Management of the Dead Cluster sa Emergency Operation Center sa LGU CDO, nasulbad na ang kanhi suliran sa aso nga gibuga sa crematorium nga milungtad og kapin 5 ka minuto nga gika-alarma sa mga molupyo duol sa maong dapit.
Basi sa latest update ni Engr Cuenca, mokabat na lamang sa 20 hangtud 30 segundos ang aso nga mogawas sa chimney sa Divine Shepherd kompara sa milabay’ng semana.
Gipasabot ni Engr Cuenca nga moabot sa 10 ang average cremation matag adlaw sa mga namatay sa COVID 19, ug bisan kadtong mga ‘suspected’ pa lamang.
Dugang ni Cuenca nga adunay 20 average deaths per day ang ilang gi-assist sa bulan sa Agosto, diin mikabat na sa 455 total deaths ang natala.
Sa maong ihap, 328 o’ 72% niini ang mipili sa cremation, samtang 127 o’ 28% lamang ang gilubong.
Samtang, gibutyag usab ni Mayor Oscar Moreno nga kabahin sa rehabilitation program sa City Memorial Park ang pagmugna og crematorium sa kasamtangang Bolonsori cemetery.
Tungod niini, naghangyo ang LGU CDO sa dakong pagsabot sa katawhan ilabina sa mga residente duol sa Divine Shepherd sa paningkamot sa syudad nga maserbisyohan ang mga nahiagom sa COVID 19, ingon man matabangan ang pamilya nga nagbangotan. (ACM/CIO)
