World Health Organization
Department of Health 
Taas ang pagsaludo ni City Councilor Yan Lam ‘Alam’ Lim, ang president sa Liga ng mga Barangay, sa tanan nga mitabang aron magmalampuson ang paghatag sa ECQ Special Ayuda dinhi sa syudad.
Sa hawanan sa konseho kagahapon, nagpasalamat si Kagawad Lim sa mga kawani sa city hall kinsa nagsilbi nga mga cashiers, kapolisan ug militar, mga punong barangay, barangay kagawad, ronda tanod, barangay employees, zone leaders, Sangguniang Kabataan, city scholars ug uban pang volunteers, ilabina ang komitiba nga maoy gitahasan ni Mayor Oscar Moreno sa cash assistance payout.
Namahayag si Kagawad Lim nga giantos sa mga kawani sa syudad ang init, ulan ug pagbaktas sa kabukiran aron lang mahatag sa katawhan ang special ayuda.
Bisan pa man sa mga negatibong komento ug kritisismo sa ubang mga residente nga diskontento sa ilang nadawat nga ayuda, apan wala kini nakapugong sa gipakitang kaikag ug sakripisyo sa mga cashiers, dugtong pa ni Lim.
Nagpakita usab sa ilang kaisog ang mga cashiers taliwala sa risgo sa ilang trabaho nga mataptan sa Covid-19 virus, pagdayeg ni Kagawad Lim.
Gipasalamatan usab og dako ni Kagawad Lim ang tabang sa kapolisan ug militar sa paghatag og seguridad, lakip ang paggiya ug pagtumbok sa mga benepsyaryo sa mga opisyales ug personahe sa barangay.
Apan labaw sa tanan, gidayeg ni Kagawad Lim ang kahago ug pag-antos sa komitiba nga gipangulohan ni Acting City Administrator Teddy Sabuga-a Jr, Office for Community Affairs Head Oliver Egypto, CSWD executive overseer Michael Christopher Fabello, City Treasurer Jasmin Maagad ug uban pang buhatan sa gobyerno sama sa DSWD, DILG, PNP ug AFP.
Sa iyang taho sa konseho, gibutyag ni Sabuga-a nga nahurot paghatag sa syudad ang balor P767,824,000 million nga ECQ Special Ayuda alang sa 292,763 ka mga pamilya ug indibidwal.
Sa maong gidaghanon sa mga benepesyaryo, 35 porsiyento kanila ang nakadawat og tag-P4,000, 28 porsiyento ang nakadawat og tag-P1,000, 19 porsiyento ang nakadawat og tag-P3,000, ug 18 porsiyento ang nakadawat og tag-P2,000. (IAF)
