World Health Organization
Department of Health 
Gikalipay ni Mayor Oscar Moreno ang pag-ubos sa mga kaso sa Covid-19 dinhi sa Cagayan de Oro sulod sa milabay’ng duha ka adlaw.
As of September 12, Domingo ug 13, Lunes, ang syudad mitala sa 60 ug 51 ka Covid positive cases, sumala pa sa taho ni Dr. Ted Yu, medical officer sa City Health Office.
Ang double-digit cases sa duha ka adlaw sukwahi sa milabay’ng bulan sa Agosto, diin sobra usa ka gatos ka mga kaso ang gakatala matag adlaw dinhi sa syudad.
Nasayran nga natala sa Cagayan de Oro ang double-digit cases niadto pang Hulyo 26.
Gipasabot ni Mayor Moreno nga ang hinungdan sa pag-ubos sa mga kaso mao ang kanunay nga pag-amping ug pagmatngon sa katawhan sa pagsunod sa minimum public health standards sama sa pagsul-ob og face mask, physical distancing, paglikay sa tapok-tapok, pag-disinfect sa kamot ug uban pa.
Sa pinakaulahing report sa CHO, misaka na sa 18,613 ang cumulative cases sa Cagayan de Oro sukad niadtong Marso 2020, diin 13,975 ang recoveries, 3,843 ang active cases, ug 795 ang deaths. (IAF)
