World Health Organization
Department of Health 
Nagmalampuson ang unang semana gikan sa paglusad sa ‘Trash to CashBack Program’ dinhi sa Cagayan de Oro human nakakolekta og dul-an 800 kilos nga recyclable materials nga papel, plastic ug puthaw.
Si August Paul Bacarrisas, focal person sa ‘Trash to CashBack Program’ sa CLENRO, miingon nga 762.38 kilos nga recyclables ang natigom sa exchange center nga gipahimutang karon diha sa may Gaston Park, kilid sa Ginama building.
Sa maong gidaghanon, 562.80 kilos ang papel, 156.54 kilos ang plastic, samtang 43.04 kilos ang puthaw.
Tungod niini, padayon ang pag-aghat ni Bacarrisas sa mga panimalay, opisina ug establisemento dinhi sa syudad sa pag-segregate sa ilang mga basura nga magamit pa.
Ang programa maoy pinakauna dinhi sa Mindanao nga gilusad sa City Local Environment and Natural Resources Office ubos ni CLENRO Head Engr. Armen Cuenca, uban sa pag-abag sa waste management firm nga Basic Environmental Systems and Technologies, Inc. (BEST) ug garbage collection firm sa syudad nga IPM.
Tuyo sa ‘Trash to CashBack Program’ nga mamenosan ang gidaghanon sa mga basura nga dad-on sa sanitary landfill didto sa barangay Pagalungan ning syudad.
Ang mga recyclables nga basura mahimong pabayloan sa drop off/exchange center diha sa may Gaston Park ning syudad gikan ala-7:00 sa buntag hangtud alas-4:00 sa hapon.
Ang magpabaylo sa mga segregated recyclables makaangkon og Environmental Points nga magamit sa pagpalit og mga produkto ug serbisyo sa mga partner outlets pinaagi sa cashback loyalty online platform nga bXTRA Philippines.
Subay niini, giaghat ni Engr. Cuenca ang mga katawhan sa syudad nga batasanon ang pag-segregate sa mga basura tungod kay makatabang kini sa pagprotehir sa atong kinaiyahan, sanglit gamay nalang ang mga basura nga malabay sa landfill. (IAF/photos by Paul Bacarrisas)
