SUGDAN na ang vaccination roll-out ugma’ng adlawa alang sa general pediatric population o kadto’ng nag-edad og 12-17 anyos nga walay gihambin nga balatian.
Matud ni Dr William Bernardo, acting city health officer, kadto lamang nakadawat sa text message nga una nang naka pre-register ang mahimong moadto sa vaccination site ug magdala lamang sa dokumento sama sa birth certificate, school ID, baptismal certificate o ba kaha barangay certificate.
Gipasabot ni Dr Bernardo nga gikinahanglan usab nga adunay pirmahan nga affirmation letter ang ginikanan nga magpamatuod nga walay co-morbidity o walay gihambin nga balatian ang iyang anak sa dili pa bakunahan.
Dugang niini dili usab itugot sa vaccination team ang walk-in sa mga bata nga bakunahan, ingon man istriktong ipatuman ang pag-limit sa chaperon nga mouban panahon sa pagbakuna aron malikayan ang pagdaghan sa mga tawo.
Matud ni Bernardo nga kadtong mga adunay co-morbidity magpabilin pa gihapon sa hospital setting alang sa ilang pagbakuna.
Nasayran nga gipahibalo na sa nasudnong kagamhanan ang nationwide vaccination roll-out sa mga nag edad 12-17 anyos sugod Nobyembre 3 ning tuig alang sa mga lugar nga nakahimo na og simulation ug usa ang Cagayan de Oro sa mga unang nakapahigayon na niini busa aduna nay pagtugot gikan kanila. (ACM/Photos by Roel Felicitas-CIO/JRBGH Photos)