Monday, 17 January 2022 06:57

Info drive sa Alert Level 3 gipahugtan sa mga otoridad; karaoke bars, clubs, ug susamang lugar bawal mag-abri

Written by
GIPAHIGAYON sa mga otoridad ang usa ka information campaign drive bag-ohay pa lamang diha sa mga establisemento nga temporaryong gidid-an pag-operate ubos sa mga gabayan sa Alert Level 3.
 
Pinaagi sa pagtinabangay sa Regulatory Compliance Board, Cagayan de Oro City Police Office, Disiplina Muna Advocacy Team, ug uban pang miyembro sa enforcement team, ubay-ubay ka mga establisemento ang napahinumduman nga gibawal ang pagbukas sa karaoke bars, clubs, ug susamang lugar.
 
Hingpit usab nga gibawal ang pagpa-inom sulod sa maong establisemento apan gitugtan ang mga restobar nga magbukas alang sa dine-in service, diin pagkaon lang ang mahimong ibaligya.
 
Alang sa mga food establishments, gipahinumduman usab sa mga otoridad ang mga negosyante nga ipatuman ang 30% capacity ug mandatory checking sa vaccination cards sa indoor venues, samtang 50% capacity sa outdoor establishments. (SPP/Photos by Reynan Baylin)