TEMPORARYONG gisuspende sa City Health Office ang Polio Outbreak Response Immunization (ORI) subay sa memorandum gikan sa Department of Health bag-ohay lang.

Tuyo niini nga mahatagan og higayon ang pagpakusog sa kampanya batok COVID19 diin ang mga Barangay Health Workers kon BHW magpasiugda og house-to-house surveillance ug health check sa matag barangay.

Subay niini, nanawagan si Dr. Lorraine Nery, officer-in-charge sa City Health Office, sa matag barangay nga padayunon ang pagtutok sa pagsunod sa maong mandato ingon man nga gisugdan na kini sa matag barangay.

“Among gipanawagan ang tanan natong punong barangays, constant man among coordination, pero sugod karong adlawa, mao ra pud ni atong tutokan nga pinaka-major nga activity sa tibuok siyudad sa Cagayan de Oro, ang house- to-house surveillance and census,” saysay ni Dr. Nery.
Atol sa house-to-house surveillance ug census, susihon sa mga BHW kon adunay miyembro sa pamilya nga adunay sintomas sa respiratory illness.

Sigun pa ni Dr. Nery kini usab usa ka higayon nga mapasabot sa publiko ang angay buhaton ilabina kon ang pamilya adunay Person Under Monitoring (PUM) sa ilang balay.

Plano sa LGU-CDO nga dugangan ang ‘manpower’ pinaagi sa pag-mobilize sa mga community development volunteers isip dugang sa workforce sa mga doctors, nurses, midwives, BHWS ug barangay nutrition scholars sa matag barangay sa tuyo nga mapaspas ang pagresponde niini batok COVID19.

Text by Nica Borja