Friday, 20 March 2020 02:47

PUIs sa NMMC naghulat na lang sa confirmatory test

Written by

TRESE ka Persons under Investigations (PUIs) ang nagpabilin karon sa Northern Mindanao Medical Center (NMMC) samtang naghulat sa resulta sa confirmatory test gikan sa DOH- Research Institute for Tropical Medicine (RITM) gikan sa kaulohan.

Kini ang gikompirma ni Dr.Jose Chan, Medical Director sa NMMC atol sa daily press briefing nga gipahigayon sa City Hall, Marso 20 ning tuig.

Lakip sa mga pasyente ang naghambin sa severe acute respiratory illness nga sarang hinungdan nga mataptan sa COVID-19 virus.

Duha sa 13 ka pasyente ang wala pa makuhaan og 'throat swab sample' alang sa COVID-19 confirmatory testing tungod kay mag-depende kini sa eroplano nga magdala ngadto sa DOH-RITM.

Dugang ni Dr. Chan nga aduna nay 36 ka PUI ug SARI ang nakasulod sa NMCC gikan Pebrero ning tuiga.

Pipila niini ang naka recover ug nakapauli na human nag-negative ang result sa ilang confirmatory test sa COVID-19.

Kahinumduman nga gihupay usab ni Dr. Adriano Subaan, Regional Director sa Department of Health (DOH X) ang kabalaka sa publiko nga maapektuhan ang pagpadala sa 'specimen' alang sa testing gumikan sa pag lockdown sa Manila ug uban pang lugar tungod sa bahad sa pagkuyanap sa COVID 19.

"If there are problems, there are also solutions" pagsiguro ni Dr. Subaan.

Dugang usab ni Dr. Subaan nga bag-uhay lang na organisa ang Regional Inter-agency Taskforce for the Management of Emerging Infectious Disease sa rehiyon diin siya ang nangulo.

Tumong sa nahisgutang Regional Taskforce nga komprehensibong mahisgutan ug ma plantsa ang mga concern sa katawhan samtang anaa ang bahad sa COVID 19.

 

By Archie Pagayaman