GATUSAN ka mga residente sa dakbayan sa Cagayan de Oro ang nakabenepisyo sa Tulong Panghanapbuhay sa Ating Disadvantaged/Displaced Workers kon TUPAD pinaagi sa DOLE-X Cagayan de Oro City Field Office ug inabagan sa Jobs Placement Bureau sa syudad.

 

Ang maong mga benepisyaryo gilangkuban sa mga indibidwal gikan sa Brgy. Gusa ug Brgy. Camaman-an nga labing naapektuhan sa Bagyong Odette niadtong milabay’ng bulan sa Disyembre.

 

Gipahigayon ang TUPAD orientation diha sa nagkadaiyang barangay hall diin gipasabot ang mga benepisyaryo sa angay’ng buhaton ug mga benepisyo nga gitanyag sa nasangpit nga programa sa gobyerno.

 

 

Ang TUPAD usa ka programa sa Department of Labor and Employment nga gahatag og emergency employment sa mga displaced workers, underemployed, ug seasonal workers sulod sa napulo hangtod 30 ka adlaw diin adunay madawat nga sweldo ang matag benepisyaryo human makompleto ang programa. (SPP)