AGIG paghatag og pagtagad sa climate change ug global warming, mosalmot na usab ang Cagayan de Oro sa ‘Earth Hour’ karong Marso 26, 2022 nga magsugod sa alas 8:30 hangtud alas 9:30 sa gabii.

 

Ang pagtamod sa Earth Hour pangulohan sa City Local Environment and Natural Resources Office sa pagdumala ni Engr Armen Cuenca diin iyang gihangyo ang tanang establisemento ug mga panimalay ning syudad sa pagpalong sa sugang dagitab sulod sa usa ka oras lamang.

 

Tumong sa ‘Earth Hour’ nga mausab o mapugngan ang paspas nga global warming nga makaapekto sa pagsaka sa kainit sa temperature tungod sa taas nga consumption sa fossil fuels alang sa mga nagkalain-laing industriya ug mga sakyanan.

Kahinumdoman nga gisugdan ang ‘Earth Hour’ sa tuig 2007 sa Sydney, Australia diin 35 ka nasud ug 400 ka syudad sa tibuok kalibutan ang misalmot.

 

Apan sa tuig 2011, 135 ka nasud ug 5,250 ka syduad lakip ang Cagayan de Oro ang misalmot sa ‘Earth Hour’ ug nagpadayon kini bisan pa man sa pandemya niadtong 2020 hangtud karong tuiga pinaagi sa online interactions.

Subay niini, gidasig sa CDO LGU ang tanan sa pagsalmot sa maong kalihukan alang sa pagkab-ot sa gitinguha nga equitable, nature positive ug net-zero carbon sa umaabot nga katuigan. (ACM/CIO)