AGI’G pagsaulog sa 2024 World Earth Day, gilaumang mokabat sa 10,000 ka mga volunteers gikan sa 100 ka mga partner organizations ang mosalmot sa ipahigayong Coastal Clean Up Drive ugma’ng adlawa, Abril 20 diha sa Brgy Lapasan ning syudad.

 

Ang coastal clean-up pangulohan sa lokal nga kagamhanan pinaagi sa City Local Environment and Natural Resources Office (Clenro), inabagan sa We CAN CDO Movement, usa ka multi-sectoral environment advocacy group, ug Kusgan Volunteer Inc.

 

Tumong sa maong kalihukan ang malahutayong kalamboan ug pagpanalipod sa kinaiyahan aron makabenepisyo dili lamang ang kasamtangang henerasyon, apan lakip na ang umaabot pang henerasyon.

Naglaum usab ang administrasyon ni Mayor Rolando “Klarex” Uy nga makaamgo ang katawhan sa kamahinungdanon sa pagpanalipod sa kinaiyahan aron malikayan ang mga katalagman ug mapugngan ang padayong nasinati nga kadaot sa panahon tungod sa climate change. (ACM/CIO)