PORMAL na nga gibuksan ang Nazareth Health Center isip Philhealth KonSulTa (Konsultang Sulit at Tama) package provider facility human gitunol sa Philhealth regional office ang accreditation certificate ngadto ni Kapitan Max Rodriguez III, mga opisyales sa barangay ug mga personahe sa health center, Oktubre 4 ning tuig.

 

Atol sa programa, gisaysay ni Mr. Marlon Arrabaca, hepe sa Local Health Insurance Office – Cagayan de Oro sa Philhealth Region 10 nga ang Philhealth KonSulTa program gipaluyohan sa nasudnong kagamhanang ubos sa implementasyon sa Universal Health Care program sa tuyo nga mapalapdan ang outpatient health service.

 

Kini naglangkob na sa konsultasyon sa doktor, health risk screening & assessment, select laboratory & diagnostic test ug select drugs & medicines.

 

Gipasabot usab ni Mr. Arrabaca ang dakong papel sa mga barangay health workers ug mga personahe sa health centers nga ipasabot sa katawhan ang ‘KonSulTa’ program aron magparehistro sa health centers ug magpakonsulta sa doktor sa dili pa mograbe ang kondisyon.

 

 

Alayon niini, gihingusgan ni Councilor Maria Lourdes S. Gaane, hepe sa Committee on Health & Health Insurance sa 20th city council kinsa mi-representa usab ni Mayor Rolando ‘Klarex’ Uy, ang kamahinungdanon nga mahimong ‘konSulTa’ provider ang mga health centers ilabina nga ang Cagayan de Oro usa sa mga pilot cities sa UHC.

 

Nagtuo si Councilor Gaane nga dili angayan ikompromiso ang serbisyo sa panglawas sa katawhan.

 

Dumduman lakip sa ‘RISE CDO’ development agenda ni Mayor ‘Klarex’ ang pagpalambo sa batakang serbisyo sa panglawas.

 

Misaksi usab sa kalihukan si Dr. Efren Celeste, Department Manager sa City Health Insurance Office, Mr. Abdul Obedi Alip, Social Insurance Officer III sa Philhealth X, City Health Officer Dr. Rachel Daba-Dilla, Dr. Efren Celeste sa CHIO ug Vice Mayor Jocelyn B. Rodriguez. (AGP/Rod Constantino/CIO)