SUGDAN na sunod semana sa Cagayan de Oro COVID-19 vaccination team ang pagpamakuna sa ‘second booster dose’ alang sa 18 anyos pataas nga ‘immunocompromised population’ kon ICPs.

 

Kini alayon sa gipagawas nga Department of Health Memorandum 2022-0154 niadtong Abril 22 o ang “Interim Operational Guidelines on the Administration of 2nd COVID-19 Vaccine Booster Doses to Immunocompromised Population (ICPs) ages 18 years old and above”.

 

Giklaro ni Dr. William Bernardo, acting City Health Officer, nga ang gitugotan pa nga mahatagan sa ikaduhang booster dose mao ang mga 18 anyos pataas nga mga immunocompromised o mga huyang ang resistensya, kinsa natupokan sa unang booster dose tulo ka bulan ang milabay.

 

Kinahanglan lang nga ipakita ang valid identification card, vaccination card ug medical certificate isip pamatuod nga ikaw nasakop sa immunocompromised population.

 

Sigon sa gabayan sa DOH, lakip sa mga naglangkob sa ICPs mao ang mga taong adunay immunodeficiency, HIV, active cancer o malignancy, transplant recipients, undergoing steroid treatment, patients with poor prognosis/bed-ridden patients, ug uban pang kondisyon sa immunodeficiency nga gi-certify sa usa ka medical doctor. (AGP/CIO)