DUNGAN sa pag-awhag sa katawhan nga magpabakuna batok COVID-19, nanawagan usab si Cagayan de Oro Mayor Klarex Uy nga motuman sa hustong pagsul-ob sa face mask, pag-obserba sa physical distancing, hand hygiene, cough etiquette ug uban pang minimum health protocols aron malikay nga mataptan sa virus.

 

Atol sa iyang programa, “Rise Cagayan de Oro”, sa usa ka istasyon sa radyo karong adlawa, Hulyo 22, gipaambit ni Mayor Klarex ang iyang nasinatian nga kalisdanan human nagpositibo sa COVID-19.

“Ayaw mo patakod og COVID kay kung maka-agi mo niana, lisod gyud kaayo. Walay tawo nga dili mahadlok, walay tawo nga dili makuyawan, labina kung moagi ka nga maglisod og ginhawa o’ maghangos ka”, saysay pa ni Mayor Klarex.

Gipasabot ni Mayor Klarex nga dako iyang pasalamat nga bakunado siya niadtong panahona ug nakasukol ang iyang lawas sa sakit dala sa COVID-19 infection.

Busa, subling nanawagan si Mayor Klarex sa katawhan nga magpabakuna na ug magpa-booster sa first ug second booster shot kung eligible na.

 

Gihangyo usab niini ang City Health Office nga pakusgan ang house-to-house ug mobile vaccination aron sa ingon maadtoan mismo sa ilang mga panimalay ang mga indibidwal nga wala pa magpabakuna.

Sigon sa datos sa City Health Insurance Office anaa pa sa 148,760 ang nahatagan sa first booster shots dinhi sa Cagayan de Oro. (AGP/CIO)