AGI’G pagsaulog sa National Disaster Resilience Month matag bulan sa Hulyo, usa ka RESCUE M.A.R.C.H (Mass Assembly for Rescue and Care for Humanity) ang ipahigayon karong Hulyo 29 dinhi sa Cagayan de Oro nga salmotan sa nagkalain-laing local government unit disaster and rescue groups sa tibuok rehiyon 10.

Kini pangulohan sa Regional Disaster Risk Reduction and Management Council 10 pinaagi sa Office of Civil Defense-10 ug mga LDRRMDs sa rehiyon.

 

Tumong sa maong kalihukan nga mabansay ang disaster and response groups pinaagi sa coordination ug pagpatuman sa disaster management, pagpalambo sa kapasidad sa matag LGU sa pagtubag kun ugaling adunay dakong kalamidad nga moigo sa Cagayan de Oro nga maoy sentro sa Northern Mindanao, ingon man mas masabtan sa katawhan ang kamahinungdanon sa awareness o kahibalo ug pagpangandam.

 

Laumang masaksihan sa katawhan ning syudad ang actual nga pag-responde sa mga disaster response groups gikan sa lain-laing LGUs sa rehiyon sa simulation nga pagahimuon diin makasinati og 7.2 magnitude ang Cagayan de Oro nga miresulta sa pagkaguba sa kadalanan ug tulay hinungdan nga maglisod ang mga rescuers ug kinahanglan nilang magbaklay dala ang ilang mga rescue tools and equipment.

 

Subay niini, gitahasan ang Incident Management Team (IMT) sa Cagayan de Oro uban sa pag-abag sa Provincial Disaster Risk Reduction and Management Office sa Misamis Oriental nga magbutang og Incident Command Post sa Pelaez Center diin didto pagahimuon usab ang closing program sa Disaster Month human sa actual rescue operations simulation.

Tungod niini, gipahibalo ang katawhan nga dili lamang ikatingala kun ugaling makasaksi sila og mga actual rescue operations karong Hulyo 29, adlaw’ng Biyernes. (ACM/Photos by ROEL FELICITAS/CIO)