MALIPAYON ang 252 ka mga pamilya nga biktima sa sunog diha sa Sitio San Isidro Labrador, barangay Lapasan ug Sitio St. John, barangay Puntod human midawat og ayuda gikan sa Department of Social Welfare and Development X, Agosto 2, diha sa Sto. Nino, barangay Lapasan covered court, ning siyudad.

 

 

Sumala ni Basilia Cantarona, usa sa mga biktima sa Sitio San Isidro Labrador, dako kini og ikatabang sa ilang kalisdanan. "Dako kay ang akong kalipay… nakatabang sa among kalisdanan, ingon man sa kapait sa among kahimtang nga nasunogan mi, nawad-an mi og balay. Pasalamat gihapon mi nga niabot ang panahon nga natabangan mi. Ang akong mensahe sa DSWD uban sa CSWD, nagpasalamat ko og dakong uyamot nga nasalbar mi sa among kalisud."

Ang ayuda gilangkoban sa food packs, hygiene kit ug rice cooker.

 

Atol sa distribution, mihatag sa iyang mensahe si City Social Welfare Development (CSWD) Department Overseer Pastor Andales.

Kahinumduman nga nahitabo ang sunog niadtong Mayo 31. Ang distribution sa ayuda giabagan sa CSWD Disaster Section ug gilaumang modawat usab sila og ayudang pinansyal karong Agosto 4 gikan sa CSWD. (NLB/CIO/photos by Rod Constantino/CIO and CSWD)