NANAWAGAN si Dr. Ina Grace Chiu, national immunization program coordinator sa City Health Office sa mga ginikanan niadtong 9,620 ka mga bata nag edad 5-11 anyos nga milapas na sa gitagana alang sa ilang second dose sa COVID-19 vaccines apan wala pa mibalik sa mga vaccination centers nga gidumala sa kagamhanang lokal sa Cagayan de Oro.

 

Sumala ni Dr. Chiu, subay sa report sa City Health Insurance Office data management group, nga 9,620 ka mga bata ang due alang sa second dose gikan sa Marso 18 hangtod Agosto 18, 2022 ug kutob September 2 magpaabot ang CDO COVID-19 vaccination team sa mga ginikanan ug kabataan alang sa pagtupok niini.

 

Kaarong Agosto 23, adunay pagpamakuna sa 5 anyos pataas diha sa Limketkai mall, City Health Office, Carmen market ug Gaston park.

 

Samtang alang sa 12 anyos pataas, abli ang mga barangay health centers sa Agusan, Balulang, Bulua, Cugman, Camaman-an, Dansolihon, Macanhan, Sto Nino Lapasan ug Tignapoloan.

Sa laing bahin gihingusgan ni Dr. Teodulfo Joselito Retuya Jr, city epidemiologist nga magpabakuna gayud tungod kay ang vaccination makatabang sa pagpakgang sa pagdaghan sa kaso, ilabina nga paspas ang pagtakboy sa COVID-19 Omicron variant.

 

Nanawagan usab si Dr. Rachel Daba-Dilla, City Health Officer sa katawhan nga magpabakuna ug padayonon ang pagtuman sa minimum public health standards samtang mosaksi sa mga kalihukan sa Higalaay Festival 2022. (AGP/Photo by Wowel/CIO)