SA katuyoan nga masugdan na sunod tuig ang Cagayan de Oro City College, gilagdaan ni Mayor Rolando “Klarex” Uy ang Executive Order No. 044 o’ ang paghimo og Techncal Working Group (TWG) aron paghimo og feasibility study sa maong katuyoan.

 

Lakip sa milangkob sa TWG si Mayor Klarex isip chairmen, ug 4 ka vice chairman nga sila si Councilor Suzette Magtajas-Daba, DepEd Schools Division Supt. Cherry Mae Limbaco-Reyes, Local School Board ug Commission on Higher Education Region 10.

 

Apil usab sa TWG ang pipila ka buhatan sa City Hall sama sa City Administrator’s Office, Human Resource and Management Department, City Legal Office, City Budget Office, City Engineering Office, City Planning and Development Office, City Treasurer’s Office, City General Services Office ug City Accounting Office.

 

Kahinumdoman nga laraw ni Mayor Klarex ang katukoran sa city college aron mahatagan og higayon ang tanang interesadong makatapos sa kolehiyo ilabina gayud ang mas nanginahanglan ug dili makasarang sa pagpadayon sa kolehiyo. (ACM/CIO)