Mokabat 24 ka mga benepisyaryo sa land titling program sa syudad ang nakadawat og titulo sa yuta sa pagpangulo ni Mayor Rolando `Klarex’ Uy uban ni City Councilor Edgar Cabanlas atol sa flagraising ceremony sa city hall Lunes, Sept. 5, 2022.

 

Ang land title distribution gihingusgan sa Task Force for Emancipation of Piso-piso Beneficiaries/Land Asset Management Office (TFEPB/LAMO) nga gipangulohan ni City Councilor Edgar Cabanlas, uban ni TFEPB Executive Director Engr. Armen Cuenca.

 

 

Gipasabot ni Engr. Cuenca nga gitabangan sa syudad pinaagi sa TFEPB ang mga molupyo sa Bliss diin aron makatitulo kini ubos sa kanhi Piso-piso program human napasagdan ang maong housing program nga gidumala ni kanhi first lady Imelda Marcos ug ubos pa usab sa administrasyon ni kanhi Pres. Ferdinand Marcos.

 

Sa susamang kalihokan, gipirmahan usab ni Mayor Klarex ang Deed of Absolute Sale sa unom ka mga molupyo sa kanhi Piso-piso site human sila naka-fully paid sa yuta nga ilang gi-okupar.

 

Ang mga benepisyaryo anaa nanimuyo sa Balangay Pangandoy, Cagayan de Oro Socialized Housing Project (CDORSHP 1) sa Calaanan, Brgy. Canitoan; CDORSHP 4, Brgy. Balubal; Lapasan Socialized Housing Project, Brgy. Lapasan; Isla Cupa Socialized Housing Project, Brgy. Consolacion, ug Macanhan Relocation Project, Brgy. Carmen.

 

Sa iyang mensahe, gipahalipayan ni Mayor Klarex ang mga benepisyaryo ug masaligon nga daghan pa nga mga molupyo sa nagkadaiyang relocation sites ug housing projects sa syudad ang makadawat og titulo titulo sa yuta. (ALR/CIO/Photos by Roel Felicitas/CIO)