Kinahanglanon ang presensya sa maritime police aron masiguro nga luwas ang maritime areas sa dakbayan sa Cagayan de Oro, ilabina kung adunay mga dagkong kalihokan sa syudad sama sa fiesta.

 

Kini ang gipadayag ni Kagawad Romeo Calizo, chairman sa committee on public safety & order atol sa joint City-Provincial Peace and Order Council briefing nga gitambongan nila ni Cagayan de Oro City Mayor Rolando `Klarex’ Uy, ug Misamis Oriental Gov. Peter Unabia bag-ohay lang.

 

“During the recent fiesta celebration, we were in dire need of maritime security assistance,” matud ni Kag. Calizo.

 

Siya midugang nga limitado lamang sa traffic management ang mga personahi sa Roads and Traffic Administration (RTA) ug dili sa pagbantay sa mga tawo nga nagtapok daplin sa baybayon alang sa kalihokan nga may kalabutan sa fiesta sama sa fluvial procession.

 

Sa briefing nga gi-host sa City Department of Interior and Local Governments (DILG), nasayran nga kulang sa ekipo ug personahi ang maritime police nga naka-base sa syudad aron matubag ang gikinahanglan nga maritime security sa syudad.

 

Matud ni Calizo nga dako usab nga panginahanglanon sa probinsya sa lig-on nga maritime police aron masiguro nga luwas ang ilang kabaybayonan.

 

Subay niini, nagkauyon sila si Mayor `Klarex’ Uy, ug Gov. Peter Unabia nga magtambayayong alang sa pagpatunhay sa kahusay ug kalinaw sa syudad ug probinsya tungod kay makaapekto kini sa industriya sa turismo ug patigayon. (ALR/CIO with photos by Isabelle Czarina Soriano/CMO)