GIPANGULOHAN ni Kapitana Rosemary V. Uy sa barangay Carmen ang ribbon cutting ug launching sa Philhealth KonSulTa (Konsultang Sulit at Tama) program sa Carmen health center, Septiyembre 19, human gihatag sa Philhealth Region 10 ang accreditation certificate isip KonSulTa Package provider.

 

 

Atol sa maong kalihukan, gipasalamatan ni City Councilor Maria Lourdes S. Gaane, chairperson sa Committee on Health & Health Insurance, ang makanunayong suporta sa Philhealth regional office alang sa programa sa panglawas, lakip mga opisyales sa barangay Carmen ug katawhan niini.

 

 

Gipasabot ni Mr. Marlon Arrabaca, hepe sa Local Health Insurance Office - Cagayan de Oro, ang KonSulTa program tipik lamang sa implementasyon sa Universal Health Care Law nga nagtinguha mapalapdan ang outpatient health services sama sa primary care services, select laboratory & diagnostic examination ug select drugs & medicines.

 

Nagtuo si Arrabaca nga tungod sa KonSulTa program mamenusan ang mga insidente sa pagkamatay niadtong adunay kasilik-an sa panglawas nga wala man lang makapakonsulta sa doktor.

 

 

Ang Philhealth accreditation sa mga health facilities nga gidumala sa kagamhanang lokal bunga sa hugot nga koordinasyon tali sa City Health Insurance Office, City Health Office, JR Borja General Hospital, uban sa suporta ni Mayor Rolando ‘Klarex’ Uy. (AGP/Photos by Rod Constantino/CIO)