Balor P10 milyones nga pundo ang gitagana sa administrasyon ni Mayor Rolando “Klarex” Uy alang sa mga proyekto sa Barangay Macasandig.

Kini ang gibutyag ni Mayor Klarex atol sa iyang pagtambong sa pagpakayab sa nasudnong bandila, adlaw’ng Martes, Septiyembre 20 sa konseho sa barangay Macasandig.

 

 

Sigon pa ni Mayor Klarex gihatagan niya og katungod ang konseho sa barangay Macasandig nga maoy mopili ug mopatuman sa mga proyekto tungod kay nagtuo ang mayor nga mas nasayod ang mga opisyales sa barangay kung unsa ang gikinahanglan sa ilang barangay.

 

Sa samang higayon, mitunol usab si Mayor Klarex og 500 ka food packs alang sa mga kabus nga pamilya sa barangay Macasandig.

 

Sa iyang bahin, mipaabot sa iyang dakong pasalamat si Kapitan Amor Sanchez kang Mayor Klarex tungod sa paspas nga pagtubag sa mayor sa ilang mga hangyo sama sa pagpasuga sa Macasandig-Balulang bridge, ug pag-atiman sa problema sa baha diha sa may Sitio Tambo area.

 

Kahinumduman nga misaad si Mayor Klarex nga mobisita sa kabarangayan matag adlaw’ng Martes aron motambong sa ilang flagraising ceremony. (AMTB-CIO/Photos from CMO)