Masaligon ang mga personahi sa Enhanced Comprehensive Local Integration Program kon ECLIP nga mas mapalig-on pa ang mga kalihokan ug programa niini ubos sa administrasyon ni Mayor Rolando `Klarex’ Uy human nila gipresentar sa mayor ang mga kalambuan ug programa atol sa ilang pag-courtesy call adlaw’ng Martes Okt. 4.

 

Gawas sa mga kalambuan, gipresentar usab sa team ang bag-ong mga miyembro sa ECLIP, ug gani anaa na kini karon sa buhatan sa City Legal aron mabuhatan og Executive Order pamahayag ni Norhidaya H. Hadji Sarip, RSW Head, ECLIP Section sa City Social Welfare Department (CSWD).

 

Gani, adunay turnover sa mga housing units ang National Housing Authority (NHA) ngadto sa 43 ka former rebels (FRs) karong adlaw’ng Biyernes nga maoy usa sa mga benepisyo nga gisaad kanila sa nasyonal nga kagamhanan, dugang ni Hadji Sarip.

 

Gipasabot usab Hadji Sarip nga dili tanan 94 ka FRs molupyo ning syudad pero ilang gipili nga dinhi sa Cagayan de Oro mo-surrender kay ilang nabati nga luwas ang ilang kinabuhi, ingon man plastar ug han-ay na ang mga programa sa City ECLIP.

 

Basi sa EO 70 ni kanhi Presidenti Rodrigo Duterte, bisan asa nga lugar sa nasud nga sa ilang tan-aw luwas ang ilang kinabuhi mahimong mo-surrender ang mga sakop sa New People’s Army (NPA) ug dili mahimong balibaran sa local government unit (LGU). (ALR/CIO/Photos from CMO)