GIPAHIGAYON sa Department of Trade and Industry – Misamis Oriental (DTI-MOR) ug Regulatory Compliance Board (RCB) ang usa ka special enforcement activity diha sa usa ka dakong mall sa dakbayan ning adlaw’ng Martes, Oktubre 11, aron masuta kung misubay sa mga gabayan ang mga establisemento sulod sa mall.

 

Gisuta sa mga otoridad ang mga mandatory items nga gilangkuban sa mga appliances sama sa rice cooker, induction stove, food processor, coffee maker, turbo broiler, blender, ug uban pa nga gikinahanglan adunay Import Commodity Clearance (ICC) sticker o’ Philippine Standard (PS) Quality/Safety Mark.

 

Nasayran atol sa enforcement nga ubay-ubay ka mga produkto ang walay ICC sticker o’ PS Mark, hinungdan nga gi-konpiskar kini sa mga otoridad ug kasamtangang anaa sa kustodiya sa DTI-MOR.

Gi-isyuhan usab sa DTI-MOR ang maong establisemento sa Notice of Violation nga gikinahanglan usab tubagon sa management sa maong tindahan sulod sa 48 ka oras.

 

Nasuta usab sa RCB nga nag-operate ang ikaduhang branch sa maong establisemento bisan og wala pa kini business permit, ug mahimong multahan ang tag-iya niini tungod sa kalapasan sa gabayan sa lokal nga kagamhanan.

Gipahimangnuan ni RCB Chairman Atty. Jose Edgardo ‘Egay’ Uy ang mga owners/operators nga kanunay sundon ang mga gabayan sa dakbayan alayon sa mga business establishments alang sa kaayuhan sa mga mamalitay.

 

Magpadayon ang joint inspection and enforcement activity sa Department of Trade and Industry, Regulatory Compliance Board, ingon man sa City Price Coordinating Council aron masiguro nga protektado ang consumer rights sa mga Kagay-anon isip usa sa mga lakang nga mapatuman ang economic recovery agenda ni Mayor Rolando ‘Klarex’ Uy. (SPPalen/Photos by Reynan Baylin/ Layout by Rod Constantino)