MAPASIGARBOHONG gipresentar ug giturn-over sa Cave Management Technical Working Group (TWG), sa pagpangulo si Engr. Armen Cuenca, ang Buntod Cave Map nga nahimutang sa Sitio Langag, Brgy Dansolihon ning syudad sa kagamhanang local ning syudad.

 

Ang maong pagtuon gisugdan sa tuig 2018 diin tumong niini ang pag-ila ug pagpanalipod sa kinaiyahan, ingon man pagpalambo usab sa turismo sa Cagayan de Oro.

Sa taho sa Cave Management TWG, gisugdan ang pag-assess sa Buntod Cave niadtong Hunyo 2022 diin usa lamang kini sa 9 ka mga langob nga gisusi sa maong grupo.

 

Samtang mibisita usab ang TWG ug gipresentar ang mapa kang Mayor Rolando “Klarex” Uy sa iyang buhatan adlaw’ng Lunes, Oktubre 17 nga gikalipay sa mayor.

 

Matud ni Mayor Klarex dako og tabang sa ekonomiya ang pagpalambo sa turismo apan wala nagpasabot nga talikdan ug dili atimanon ang katungod sa Indigenous People ug ilang kultura.

 

 

Ang TWG gilangkoban sa Department of Environment and Natural Resources Region 10 – PENRO, CENRO, Department of Tourism, City Local Environment and Natural Resources Office (Clenro), City Tourism Council, City Engineering Office ug City Planning and Development Office. (ACM-CIO/Photos by Aicy Soriano-CMO)