DAKONG garbo sa Cagayan de Oro nga nalakip sa finalists alang sa 2022 Galing Pook Awards tungod sa mga kalamboan ug kalampusan sa natad sa edukasyon.

 

Uban sa entry nga “Making Dreams Come True: Providing Better Access to Quality Education in Cagayan de Oro”, mao na kini ang ikaupat nga entry sa syudad sugod tuig 2013 hangtud 2022 ubos ni kanhi Mayor Oscar Moreno, uban sa suporta ug pag-abag ni Mayor Rolando “Klarex” Uy.

 

Kahinumdoman nga tulo ka higayon na nga nasakmit sa Cagayan de Oro ang Galing Pook Award ug malaumon si Mayor Klarex Uy nga masungkit na usab sa syudad ang laing Galing Pook Award.

Gikatakdang moatubang sa panel presentation ug interview ang mga kadagkoan sa syudad ilabina sa komitiba sa edukasyon sunod bulan.

 

Subay niini, gipadayag pag-usab ni Mayor Klarex ang iyang hugot nga suporta sa edukasyon sanglit usa kini sa priority agenda sa iyang administrasyon. (ACM/CIO)