Human sa coordination meeting nga gipahigayon adlaw’ng Martes, adunay mga polisiya ug regulasyon ang gikatakdang ipatuman ni Mayor Rolando `Klarex’ Uy kalabot sa pagpamaligya sa sidewalk vendors palibot sa merkado sa Cogon.

 

Una, walay sidewalk vendors ang tugotan nga mamaligya sa mga dalan JR Borja, Captain Vicente Roa ug Yacapin aron dili maghuot ang dagan sa trapiko, ug adunay maagian ang katawhan.

 

Ikaduha, pagpatuman sa tukmang oras nga sila makapamaligya sugod sa alas 6:00 sa gabii hangtod alas 5:00 sa buntag.

 

Ikatulo, limpiyohan ug hipuson sa mga vendors ang ilang mga basura diin matag usa kanila kinahanglan adunay kaugalingon nga sudlanan sa ilang basura sama sa sako ug uban pa.

 

Ikaupat, ang mosupak pagamultahan pinaagi sa pag-isyu og Ordinance Violation Receipt (OVR).

 

 

Pipila lamang kini sa mga balaod nga ipatuman ni Mayor Klarex human kini nagpahigayon og surprise inspection niadtong Sabado sa gabii, diin personal nga nasaksihan nga halos giokupar na sa mga sidewalk vendors ang tibook dalan, hinungdan sa kapiot sa dagan sa trapiko.

 

Ang coordination meeting giapilan nila ni Kag. Yan Lam Lim, ug Kag. John Michael Seno, mga kadagkuan sa RTA, CEED, COCPO, Police Station 2, Clenro, City Legal Office, City Engineer’s Office, CPSO, CSWD, City Administrator’s Office, mga punong barangay sa Barangay 28, 32, 33, 34, 38 ug 39. (ALR/CIO/Photos by Reynan Baylin/CIO)