TRESE ka pampublikong tunghaan sa Cagayan de Oro ang magtigi alang sa ‘Search for Top 3 School-based Teen Center’ nga ipahigayon karong Disyembre 9 ning tuig atol sa ‘PASIGARBO: PopDev Festival of Talents’ aron mapalapdan ang ‘Adolescent Sexual & Reproductive Health Program’.

 

Ang nasangpit nga aktibidad gipaluyohan sa nagkadaiyang ahensya lakip ang kagamhanang lokal sa Cagayan de Oro pinaagi sa Community Improvement Division – Adolescent Health & Development Program, Oro Youth Development Office, City Health Office, Department of Education – CDO, Commission on Population & Development Region 10, ReachHealth – US AID ug uban pang mga partners ug stakeholders.

 

Bag-ohay lang natapos ang gipahigayon nga ‘evaluation’ sa 13 ka mga tunghaan sugod Nobyembre 21 kutob 24 diin adunay mabungahon nga pagbinayloay sa impormasyon ug rekomendasyon aron mas mapalambo pa ang mga ‘teen-centers’ sa tuyo nga daghan pa nga mga kabatan-onan ang maserbisyohan.

 

Ang mga misalmot nga tunghaan mao ang Angeles Sisters NHS, Tablon NHS, East Gusa NHS, Lapasan NHS, Macabalan NHS, Bayabas NHS, Bulua NHS, Mambuaya NHS, Bayanga NHS, Balulang NHS, Lumbia NHS, PN Roa NHS ug Carmen NHS.

 

Sa kinatibuk-an, adunay 32 ka mga school-based teen centers sa syudad miagi sa evaluation subay sa physical facility; services & operations/COVID-19 response; ug records & documentation.

Dumduman suportado usab ni Mayor Rolando ‘Klarex’ Uy ang youth sexual & reproductive health programs aron mamenusan ang insidente sa ‘teenage pregnancy’ sa syudad. (AGP/Photos by Rod Constantino/CIO)