Pipila ka mga baligya ang gipangkarga sa Night Market Team sa unang adlaw sa pagpatuman sa balaod nga nagdili sa mga sidewalk vendors nga mamaligya sa lapas sa alas 5:00 sa buntag atol sa ilang paglibot sa Cogon Market area uban sa kapulisan.

 

Gipangkarga usab sa mga personahi sa Roads and Traffic Administration (RTA) sa pagpangulo ni Dep’t Head Engr. Nonito Oclarit ang mga kahon nga gibilin sa daplin ug gibiyaan sa mga sidewalk vendors.

Apan bisan pa man sa pagpatuman sa balaod, padayon nga gipahinumduman ug gihangyo sa Night Market Team ang mga sidewalk vendors nga mamaligya lang sila sa gitugot nga oras sugod ala-6:00 sa gabii paingon ala-5:00 sa buntag ug didto lang sa gitugot nga lugar.

 

Hinuon, malinawon ang unang adlaw sa pagpatuman sa balaod ug mga gabayan sa syudad kalabot sa pagpamaligya sa mga sidewalk ug ambulant vendors.

 

Una nang gimando ni Mayor Rolando `Klarex’ Uy nga gidid-an ang pagpamaligya sa dalan JR Borja, portion sa Osmeña ug Yacapin human sa daghang reklamo nga nadawat sa mayor tungod sa kapiot sa maong mga dalan ug maglisod na pag-agi ang mga sakyanan kay halos gi-okupar na sa mga sidewalk ug ambulant vendors.

 

Gani, hugot nga gipadayag ni Mayor Klarex nga walay mahitabo nga pagpangarate kundili ikarga lang ang mga baligya sa mga vendors nga nakasupak sa balaod.(ALR/CIO/Photos by Reynan Baylin & Rod Constantino/CIO)