Usa ka simpleng kalihokan ang himoon sa syudad ubos sa administrasyon ni Mayor Rolando `Klarex’ Uy pinaagi sa City Housing Urban and Development Department (CHUDD) alang sa ika-11th Sendong Commemoration ugmang adlawa, Biyernes, Disyembre 16, 2022.

 

Nasayran nga usa ka Santos nga Misa alang sa mga biktima sa bagyong Sendong ang ipahigayon diha sa St. Augustine Cathedral sa alas 9:00 sa buntag nga pagatambungan sa mga department managers sa city hall, mga presidenti ug bise presidenti sa Sendong Homeowners’ Association gikan sa nagkadaiyang Sendong relocation sites.

 

Human sa misa himoon usab ang wreath laying sa Sendong Memorial Wall diha sa Gaston Park.

 

Dumduman nga liboan ka mga tawo ang namatay ug ang uban wala pa nakita hangtud karon tungod sa kalit nga pagbaha human nihapak ang Bagyong Sendong dinhi sa Cagayan de Oro niadtong Disyembre 16, 2011.

Liboan usab ang nawad-an sa ilang mga panimalay human naguba ug gipang-anod sa baha.

 

Anaa na usab sa nagkadaiyang relocation sites ang mga Sendong survivors human sila giatiman sa syudad uban sa tabang sa nasyonal nga kagamhanan, ahensya ug mga pribadong grupo. (ALR/CIO/Photo by Jomar Figuracion/CIO)