Sa tinguha nga mahatagan og insaktong tinubdan sa panginabuhi, midonar ang Misamis Oriental Filipino-Chinese Chamber of Commerce og duha ka sewing machines ngadto sa Bureau of Jail Management and Penology (BJMP-10) atol sa flagraising ceremony sa city hall Lunes, Disyembre 19, 2022.

 

Ang mga makina gitunol sa kadagkuan sa chamber pinangulohan ni Mr. Tony Uy ug gidawat nila ni City Administrator Atty. Roy Hilario Raagas, kinsa maoy mi-representar ni Mayor Rolando `Klarex’ Uy, mga kadagkuan sa BJMP ug TESDA.

 

Gipasabot ni Mr. Tony Uy nga pinaagi sa maong mga makina makabaton og kahibalo ang mga Persons Deprived of Liberty (PDLs) sa female dormitory alang sa ilang panginabuhi nga magamit kung mogawas na sila.

“Kung ayuda ang ihatag sa ila, mahurot kana in one day, so maayo nga hatagan sila og ilang magamit sa ilang panginabuhi,” dugang ni Uy.

 

Nunot niini, gipasalamatan sa BJMP ang Filipino-Chinese Chamber of Commerce sa maong donasyon kay makatabang kini og dako sa mga female inmates ilabina nga daghan usab ang adunay skills sa pagpanahi.

Mipadangat usab sa iyang pasalamat si Atty. Raagas ngadto sa maong grupo ug sa TESDA. (ALR/CIO/Photos by Roel Felicitas/CIO)