World Health Organization
Department of Health 
Gipasalamatan ni City Councilor Edgar Cabanlas ang 13 ka Homeowners Associations (HOAs) gikan sa nagkadaiyang relocation sites sa syudad tungod sa ilang panaghiusa atol sa oathtaking ceremony, Miyerkules, Disyembre 21, 2022, sa city hall quadrangle.
Ang bag-ong napili nga mga opisyales sa HOAs nanumpa kang Kag. Cabanlas kinsa maoy mi-representar ni Mayor Rolando `Klarex’ Uy.
Giaghat ni Kag. Cabanlas ang mga HOAs nga maghiusa ug maglig-on taliwala sa mga hagit nga masinati sa ilang grupo aron dili masayang ang ilang mga paningkamot ug ang paningkamot sa syudad.
Samtang gipadayag ni Sheila Lumbatan, Chief of Staff ni Mayor Klarex, nga moalalay ug mogiya kanunay ang gobyerno sa mga HOAs apan anaa usab kanila ang mahinungdanong bahin aron molambo ug magmalampuson ang programa.
“Sama sa kanunay nga isulti ni Mayor Klarex nga sa pag-uswag kauban ang tanan,” dugang ni Lumbatan.
Alayon niini, mipadangat usab sa ilang pasalamat kang Mayor Klarex ang mga opisyales sa maong HOAs kay padayon nga gitagad sa mayor ang ilang mga panginahanglanon ug problema sa ilang mga relocation sites.
Ang kalihokan gidumala sa City Housing & Urban Development Department (CHUDD) pinangulohan ni Atty. Joeffrey D. Namalata, dep't manager uban sa mga personahi sa maong buhatan. (ALR/CIO/Photos by Jay Arancon/CIO)
