Dili mominos 30 ka mga baboy ang gidispatsar ug gilubong sa mga personahi sa City Veterinary Office inabagan sa City Engineering Office, ug mga opisyales sa Barangay Mambuaya diin didto kini gilubong.

 

Nasayran nga nakonpiska ang maong mga baboy niadtong Disyembre 31, 2022, sa alas 2:00 sa kaadlawon human giingong gi-‘hurdle’ sa sakyanan nga gikargahan sa maong mga baboy ang Animal Quarantine Checkpoint sa Opol, Misamis Oriental tungod kay wala usab naka-presentar og legal document ang tag-iya.

 

Gibutyag ni City Veterinarian Dr. Perla Asis nga miresponde gilayon ang mga personahi sa City Vet ug gigukod ang sakyanan uban sa tabang sa kapulisan hinungdan nga nasapon kini.

 

Matud ni Dr. Asis nga gihatagan og 24 oras ang tag-iya aron makakuha og legal document diin gikuha ang maong mga baboy, apan pakyas kini hinungdan nga gipa-blotter kini sa kapulisan.

 

Padayon nga gipahugtan sa syudad pinaagi sa City Vet ang pagbantay sa mga borders ug gipatuman ang mga lakang aron mapugngan nga dili na subling maigo sa African Swine Fever (ASF) ang syudad sa Cagayan de Oro. (ALR/CIO/Photos from City Vet)