Mas hapsay ug luag karon ang dalan palibot sa Cogon Market area sukad gipatuman sa Night Market Management Committee (NMMC) ang pagplastar sa mga sidewalk vendors ug padayon nga pag-monitor aron masiguro nga walay subling mamaligya sa kadaplinan.

 

Kanunay gihangyo ni Mayor Rolando `Klarex’ Uy ang mga sidewalk ug ambulant vendors nga mosunod gayud sa balaod sa syudad human sila giplastar sa laing puwesto alang sa kaangayan sa tanan.

Gipasidan-an usab sila ni Mayor Klarex nga posibleng makuhaan sila og kahigayonan nga makapanginabuhi kun padayon nga mosupak sa balaod.

 

Kini ang hinungdan nga gimugna ni Mayor Klarex ang Night Market Management Committee nga gi-co-chair ni kanhi Kag. Enrico Salcedo sa tinguha nga maplastar ang mga sidewalk vendors ug magpabilin nga makapanginabuhi.

Nunot niini, gipasalamatan ni Mayor Klarex ang team ilabina ang mga personahi sa Roads and Traffic Administration (RTA), ug Cagayan de Oro City Police Office (Cocpo) Police Station 2 sa ilang makanunayong clearing operations palibot sa Cogon market. (ALR/CIO/Photos from NMMC & RTA)