Atol sa pagbisita sa mga kadagkuan sa Philippine TCM Center, nagpasalamat si Mayor Rolando ‘Klarex’ Uy sa gipakitang interes sa grupo nga magtukod ug usa ka center dinhi sa dakbayan, ilabina nga ang Cagayan de Oro giilang trading Center dinhi sa rehiyon.

 

Sigun pa sa mayor ang plano nga TCM Center dakong tabang sa sektor sa panglawas, ug ingon man sa economic sector sa syudad.

 

Dugang pa sa mayor nga tungod sa paghuyang sa ekonomiya nga epekto sa pandemya, mas gipakusog pa karon sa dakbayan ang pagpabangon sa ekonomiya pinaagi sa pagdani og daghang mga investors nga makatabang sa paghatag og mas daghan nga trabaho ug serbisyo sa mga Kagay-anon.

 

Nasayran nga dili pa lamang dugay gipahigayon ang usa ka consultative meeting tali sa Philippine TCM Center Inc. ug sa lokal nga kagamhanan sa Cagayan de Oro nga gitambongan mismo ni Mayor Klarex Uy, City Administrator Atty. Roy Raagas, Philippine TCM Center Inc. President Dr. Qiming Zheng, Assistant of the CEO Jazmine Maglipon, Associate Acupuncturist ug TCM Online Project Officer Kathryn Lopez, Cagayan de Oro Filipino-Chinese Community Chairman Greg Marten Lao, Dr. Marie Jee Valdevilla sa JR Borja General Hospital, JRBGH executive overseer Dr. Ferdie Miranda ug ORO-TIPC Head John Asuncion.

 

Lakip usab sa miapil sa maong meeting via Zoom sila si Fujian University of TCM President Li Candong, Department of Health (DOH) Undersecretary Maria Francia Miciano-Laxamana, ug DOH-10 Chief of Local Health Support Division Dr. David Mendoza. (GB/photos by Kim Zaldivar)