IPAILAWOM sa retrofitting and repair ang Bugo National High School human kini nakaangkon og kadaot tungod sa epekto sa linog nga nasinati ning syudad sa nanglabay’ng katuigan.

 

Sa gipahigayong Local School Board meeting bag-ohay lang, gibutyag ni City Engineer Jenito Asequia nga gisusi sa ilang buhatan ang kadaot sa maong tunghaan agi usab og pagtubag sa sulat sa kadagkoan sa Department of Education – Division of Cagayan de Oro sa ilang namatikdan nga mga liki.

 

Ang maong kondisyon nakahatag og kabalaka sa mga magtutulo, mga ginikanan ug kadagkoan sa DepEd lakip sa kagamhanang lokal ning syudad ug maoy hinungdan sa maong rekomendasyon.

 

Subay niini, gisiguro sa Local School Board pinangulohan ni Mayor Rolando “Klarex” Uy pinaagi sa City Engineering Office nga masugdan ang retrofitting sa labing dali nga panahon. (ACM/Photos by Roel Felicitas/CIO)