Nanawagan si City Mayor Rolando ‘Klarex’ Uy atol sa sinemanang pagpakayab sa nasudnong bandila sa city hall, Hulyo 3, ngadto sa tanang 18 anyos pataas nga healthcare workers ug mga senior citizens nga pahimuslan ang third booster bivalent vaccines aron mas mapakusgan ang proteksyon batok COVID-19.

 

Dumduman bag-ohay lang gilusad sa syudad ang third booster bivalent vaccination rollout niadtong Hunyo 29, diin ang Cagayan de Oro adunay 3,680 nga alokasyon sa bakuna.

Gipasabot usab ni Dr. Ina Grace Chiu, National Immunization Program Medical Coordinator sa City Health Office, nga ang third booster shot alang pa lamang sa mga healthcare workers ug senior citizens nga nakakompleto na sa second booster shot upat ka bulan ang milabay.

 

Nasayran ang bivalent vaccine mas gipakusog nga bakuna batok COVID-19 kung asa mahimo kining mo-away dili lang sa ‘original strain’ sa virus, apan lakip na usab ang Omicron sub-variants niini.

Mahimong magpatupok sa third booster shot diha sa City Health Office, Lunes hangtod Biyernes, alas 9:00 sa buntag hangtod alas 4:00 sa hapon. (AGP/Photo by Rod Constantino)